Mourad Kadiri

سلا

1 - لانّة خيتي واختيتي
مال موسك حفا

مال جمرك طفى
ولبارح كان شعّال
مال زهرك صفار… وذبال؟
قالت السواني ولخصورا
قال البلّوط ف معمورة:
لالّة عروسة
الشّامة والخال والشفر
الحجبان وظفاير الشعر
وسوالف
تحلم ب حنّة ونكاكف
وب الطّيفور
يدور… يدور
ف دار ابّاها… تيدور
تحلم ب عريس
يدخل من باب لخميس
وف راس المون
ثَمّ
يكون اللّي يكون

2- لالّة خيتي… واختيتي
صفوّر كان
يمشي لمسيد
ف لقب خبزة بلا كدّيد
وب لفتوح
يحفظ… ويقرا اللّوح
ويرشق ليه
يوم يمنّك لفقيه
يجري ب ضحكة مبشورا
يجري ف عقابي وحدورا
ل بورقراق
أيه يا بورقراق
النظرة فيك شهوا
مذاقك لذّة… ودوا
وميتك سكّر
تعربد من دار لدار
من باب لمريسة (1)
لدرب اخيار (2)
وف زنابة (3)
تسقي اوليدات الحرّاثة
تقول لمعلّم بوزكري
طيّب لي خبزي بكري
عوّلت نسيح… نتسارا
نشعل الضو ف لمناره
ننفض الرماد
من كفوف الاولاد
ونوفي كلمة ب الزياره
للأموي (4)
مشرّط لحناك… بغاوه كناوي
ب فريّخ حلم ف الدار
ب الشمس… ب ضو النهار
بلون سماوي
هكّا حلم الأموي

3- لالّة خيتي واختيتي
ما عاد لحمام… يحمل سلام
ما عاد الطعام… يقد العام
جف البير

لا قمح… لا فول… لا شعير
لكن
الطفل الصغير
مشى لمسيد
ف لقب خبزة… بلا كدّيد
دارك ف البال
وعلى لوح الصلصال
كاع لحروف… محاها
وحروفك
حلف يتهجّاها
سلا
عيشك… عيشك
ألالّه
نفضي ريشك.


لوتد

نطلق وتد… نشد اخور
وتد القدّام، وتد اللور
وفاين مّا سرّحت العين… وتد
تحتي، فوقي، وف جنبي
وتد ف راسي
وف قلبي
ووتد قلبي
ووتد تمسكن
وتمكّن
تغرس ف عروقي وتدفن
وهدّد
حربشّ… تفك حبالك
يتزاد خبالك
تعيا… تتلف
حربش
تحركّ… تنفنف.
قلت: لوتد ونقلعو ب اضراسي
أرا نشرب دكّة من كاسي
اللّي ف راس لوتد ف راسي
لقيت… أنا ولوتد خّوت
قفل وساروت
يحك ليّا… نحك ليه
يشفّج ليّا… تعسّل ليه
وبلا بيه
نموت…